Mayo pang nakukua an Philippine National Police (PNP) nin anuman na senyales o intensyon nin pagsuko hale ki Senador Ronald “Bato” Dela Rosa.
Segun ki PNP spokesperson Police Colonel Allen Rae, mayo pa nin anuman na senyales nin pagsuko an senador sa ibong kan sarong semana na palugit na itinao saiya kan mga awtoridad.
Idinugang pa kan departamento na ini na an oportunidad ni Bato na tapuson na an pagtatago asin sumuko na sana nin may dignidad.
Nagtalaga na nin dugang na tracker teams an pamayoan tanganing matunton si Dela Rosa, segun sa Philippine National Police, alagad mas gusto pa man giraray kan mga awtoridad na magsumuko si Bato nin matuninong tanganing malikayan an anuman na kariribokan.
Naroromdoman na inanunsyo sa publiko na igwa nin pabuyang 50 million pesos para sa makakatunton sa kinamumugtakan ni Senador Dela Rosa.
Sa pinakahuring impormasyon hale sa DILG, si Bato daa pinoprotektahan nin armadong grupo sa Mindanao.
Wanted ngunyan si Dela Rosa kan International Criminal Court (ICC) huli sa kasong crimes against humanity na may kinaaraman sa “war on drugs” ni dating Presidente Rodrigo Duterte.
Inakusaran an senador bilang co-perpetrator sa nasabing kaso.
