Bukas an kaisipan ni Senate Finance Committee Chairman Sen. JV Ejercito, sa posibilidad na imbitaran an mga grupong nagbabantay sa pambansang budget sa mga pagdangog kan bicameral conference committee.
Sa bicam, pag-uurulayan asin pagtutugmahon kan mga senador asin kongresista an kanya-kanyang bersyon kan panukalang 2027 national budget bago ini tuluyang maipasa.
Kaiba sa mga grupong nagpahayag nin kagustuhan na surion an paggamit kan pondo kan gobyerno an People’s Budget Coalition, na naglatag kan mga nahihiling kaining problema sa panukalang badyet sa sarong pampublikong konsultasyon kan nakaaging Lunes.
Segun sa coalition, sobra P1 trilyon na kantidad kan mga alokasyon an dapat na masusuri nin marhay.
Kaiba digdi an mga pondong inilaan para sa mga proyektong pang-imprastraktura, mga programang ayuda, asin unprogrammed appropriations.
Pig-insiitir kan grupo na kaipuhan na maging bukas sa publiko an mga dokumento asin detalye kan mga proyekto tanganing masuri kun sain mapupunta an kwarta kan mga nagbabayad nin buwis.
Mientras tanto, nanawagan man si Sen. Panfilo “Ping” Lacson na matawan nin oportunidad an civil society organizations na makasubaybay sa mga pagdangog kan bicam.
Para ki Lacson, makakatabang an mga grupong ini sa pagsusuri kan panukalang badyet, orog na ta napakaraming probisyon asin proyekto an kaipuhan na himayon bago magkasundo an duwang kapulungan kan Kongreso.
Apwera sa mga proyektong pang-imprastraktura asin ayuda, kaiba man sa mga isyung idinulok kan mga advocacy group an pondo para sa Philippine Health Insurance Corp. o PhilHealth.
Gusto kan mga health advocates na dugangan an subsidiya sa ahensya tanganing masuportahan an mga benepisyo kan mga miyembro asin mabawasan an saindang gastuson sa pagpapabulong.
Nasa P7.2 trilyon an panukalang pambansang budget para sa 2027.
