Kinumpirma kan Department of Justice an pagsusumite ni dating Senate Sergeant-at-Arms Mao Aplasca nin ‘counter-affidavit’ manungod sa reklamo na saiyang inaatubang.
Personal na nag-abot si Aplasca sa opisina kan kagawaran asin inatendiran an ikatulong pagdangog kan preliminary investigation sa reklamong isinangat kontra saiya.
Inaatubang kan dating opisyal an ‘direct assault complaint’ na isinangat kan Philippine National Police-Criminal Investigation and Detection Group o PNP-CIDG.
Ini may koneksyon sa nangyaring pamamaril o ‘shooting incident’ kan bulan nin Mayo sa laog mismo kan Senado.
Segun ki Justice Spokesperson Atty. Polo Martinez, pagkatapos kan pagsusumite kan kontra-salaysay, hahalatón kun masangat pa nin ‘reply-affidavit’ an mga ‘complainants’.
Itinakda an pagsusumite kan simbag sa ika-6 kan Nobyembre mantang an ‘rejoinder-affidavit’ man sa lado kan mga ‘respondents’ pwedeng isumite sa ika-13 kan kaparehong bulan.
Kun dai na magsumite nin ‘reply-affidavit’ an Pambansang Pulisya sa kontra-salaysay ni Mao Aplasca, magigin ‘submitted for resolution’ na an reklamo sa masunod na bulan.
Susundan na ini kan pagdeterminar kan prosekusyon sa reklamo kun magigin kaso asin tulos isangat na sa maninigong korte.
An duwang kapwa-respondents man ni dating Senate Sergeant-at-Arms Mao Aplasca naenot nang nagsumite nin kontra-salaysay según sa tagapagtaram.
Maski personal na nag-abot sa kagawaran si Aplasca, naghabo na ining magkomento o magtao nin pahayag.
