Ipinagsugo kan Office of the Ombudsman an anom na bulan na preventive suspension na mayong bayad kontra sa limang project engineers kan DPWH Bulacan First District Engineering Office.
Kaiba sa mga sinuspindeng inhinyero sinda Irene D. Ontingco, Kevin A. Geronimo, John Michael E. Ramos, Bernardo P. Villafuerte, asin Michelle C. Cruz huli sa umano’y pagkasangkot sa P188.8-milyong ghost flood control projects sa Baliuag, Bulacan.
Kinakahampang kan mga nasambit an mga administratibong kaso nin grave misconduct, serious dishonesty, asin gross neglect of duty konektado sa tulong proyekto nin reinforced concrete slope revetments kan 2024.
Nagluwas sa imbestigasyon na ginibo umano kan mga inhinyero an pagpalsipika asin pagpeke kan mga dokumento sa inspeksyon, pag-ako, asin pagbayad tanganing magin lehitimo an mga proyekto.
Ipinahayag kan Ombudsman na kaipuhan an suspensyon huli sa katatagan kan ebidensya asin tanganing malikayan an ano man na pagprobar na maimpluwensyahan an mga testigo mantang nagpapadagos an imbestigasyon.
Dai man isinabay sa orden si dating Officer-in-Charge District Engineer Brice Ericson D. Hernandez asin dating Assistant District Engineer Jaypee D. Mendoza huli ta dai na sinda aktibo sa serbisyo kan gobyerno.
