Liwat na pinagiromdom kan National Capital Region Police Office (NCRPO) an mga maduman sa sementeryo na mahigot an pagbantay kan kapulisan sa mga bisita na may darang ipinagbabawal na gamit.
Segun ki NCRPO officer-in-charge PBrig. General Christopher Abrahano, sa lambang laogan asin luwasan kan mga sementeryo sa Metro Manila, igwang nakabantay na kapulisan tanganing mag-inspeksyon asin hilingon kun igwang ipinapalaog na ilegal sa mga sementeryo.
Kabali sa mga sinambit na ipinagbabawal iyo an mga nakakalasing na inomon, badil, kutsilyo, mga likidong nakakasulo arog kan paint thinner, ilegal na droga, baraha, asin iba pa.
Maglilibot an mga kapulisan sa laog kan mga sementeryo kaiba an nagkapirang force multipliers.
Ipinagbilin man ni Abrahano sa mga kapulisan na bako sana sa sementeryo maglibot kundi pati man sa mga binayaan na harong asin mga lugar na parating dinudumanan kan mga tawo pagkatapos magbisita sa mga sementeryo sa Nobyembre 1 asin 2.
