Numero kan mga Daing Trabaho sa Nasyon, Naglangkaw sa 2.86 Milyon kan Setyembre — PSA

Nairehistro kan bulan nin Setyembre an dikít na paglangkaw kan numero kan mga daing trabaho sa nasyon, segun sa Philippine Statistics Authority ngonian na Biyernes, Nobyembre 6.

Segun sa presenteng datos, naireport na naglangkaw sa 5.4% an unemployment rate kan Setyembre, na katumbas kan 2.86 milyon na indibidwal hale sa populasyon.

Mas halangkaw ini nin dikít sa 5.3% na nairehistro kan Agosto, na katumbas man kan 2.77 milyong Pilipino na daing trabaho.

Mientrastanto, nagbaba man an underemployment rate kan nasambit na bulan, na nagbagsak nin dikít sa 11% na katumbas kan 5.56 milyong Pilipino, hale sa 11.9% na nairehistro kan Agosto.