Pinaglinaw ni US Ambassador to the Philippines Lee Lipton na mayong mangyayaring pag-urulay o pagpirma manungod sa isyu kan Pax Silica sa nakatalaan na Association of Southeast Asian Nations (ASEAN) Leaders’ Summit digdi sa nasyon.
“As the U.S. Ambassador to the Republic of the Philippines, I would like to address comments in the media about an announcement on the Pax Silica Economic Security Zone to occur during or after the ASEAN Leaders’ Summit in Manila this month,” ini an opisyal na pahayag ni Amb. Lipton kan Sabado, Nobyembre 8.
Pinabulaanan man ni Amb. Lipton na magkakaigwa nin anuman na anunsyo manungod sa Pax Silica Economic Security Zone sa pagtiripon ninda Pangulong Ferdinand Marcos Jr asin US President Donald Trump sa sidelines kan ASEAN Summit.
Idiniin kan US Ambassador na an nasabing usap-usapan kaipuhan munang dumanan sa masusing konsultasyon kaiba an gobyerno bago magkaigwa nin desisyon sa nasabing proyekto.
“Decisions will be made in full consultation with the government of the Philippines at the appropriate time. As stated previously and as part of this process, we expect rigorous discussions on impacts to all stakeholders,” sabi ni Lipton.
Manungod digdi, ipinahayag man ni Philippine Ambassador to the United States Jose Manuel Romualdez na harayo sa katotoohan an pagpinalisar kan kasunduan kan Pax Silica sa nakatalaan na ASEAN Summit huli ta padagos pa man giraray an negosasyon manungod sa nasabing proyekto.
Nakatalaan na magbisita si US President Donald Trump sa nasyon tanganing makikabali sa ASEAN Summit ngunyan na bulan kan Nobyembre.
Mantang, kan ikaduwang quarter kan taon, isinapubliko an plano para sa ipinapanukalang labi sa 1,600 ektaryang AI data center sa Capas, Tarlac sa irarom kan US-initiative Pax Silica.
Nag-ani ini nin manlaen-laen na reaksyon asin pagkontra, partikular sa mga progresibong grupo asin sa komunidad kan Aeta sa Capas na sinasabing labi-labing maapektuhan kan nasabing proyekto.
