Hiniling ki Presidente Ferdinand Marcos Jr. an beynteng senador na ideklara an mga lugar na apektado o namemeligro sa epekto kan Super El Niño bilang mga lugar na nasa irarom nin deklarasyon nin kalamidad tanganing maparikas an pagresponde kan gobyerno sa piglalaoman na epekto kan grabeng tigmara.
An pangapudan yaon sa Proposed Senate Resolution No. 765, na nag-aagyat sa Presidente na maghiro kasunod kan patanid kan Philippine Atmospheric, Geophysical and Astronomical Services Administration (PAGASA) na makusog na marhay na El Niño sa Tropical Pacific.
Kabali sa mga nagpirma sa resolusyon iyo sinda Senate President Win Gatchalian, Senate President Pro Tempore Vicente “Tito” Sotto III, asin mga senador Kiko Pangilinan, Imee Marcos, Robin Padilla, Migz Zubiri, Bam Aquino, Risa Hontiveros, JV Ejercito, Lito Lapid, Joel Villanueva, Tulfoy Tulfoy, P Chiz Escudero, Alan Peter Cayetano, Pia Cayetano, Bong Go, Camille Villar asin Mark Villar.
Tinawan duon kan mga mambabatas an pangangaipo na mag-andam an gobyerno antes pa man maggrabe an epekto kan pangyayari sa panahon, partikularmente sa mga komunidad na posibleng makaeksperyensya nin kakulangan nin tubig asin danyos sa agrikultura.
Base sa pinakahuring report kan PAGASA kan Nobyembre 4, sarong Very Strong El Niño an presenteng epektibo sa Tropical Pacific asin piglalaoman na magpapadagos sagkod sa amay na parte kan 2027. Posible man na maabot kaini an pinakamakusog na lebel bago matapos an 2026.
Nagpatanid an weather bureau na madudugangan an posibilidad nin kakulangan nin uran, na pwedeng magin kawsa nin dry spells asin tigmara sa nagkapirang parte kan nasyon. Piglalaoman man na mas hababa sa normal an pag-uran sa kadaklan na parte kan Pilipinas ngonian na Nobyembre.
Magigiromdoman na nagdudulot an El Niño nin mas mainit asin tuyong kondisyon kan panahon huli sa pagbabago kan temperatura kan karagatan sa Tropical Pacific. Pwede ining makaapekto sa mga pananom, suplay nin tubig, produksyon kan kuryente asin kabuhayan kan mga paraoma.
