Nagbotohan an mga Senador tanganing rebisahon an 16-vote threshold na ginagamit sa pag convict nin sarong respondent sa kaso nin impeachment, ngonian na Miyerkules.
Ipinaliwanag ni Senator Francis Escudero, Presiding Officer kan trial, na an 2/3 voting threshold na kinakaipuhang boto para sa conviction, sa irarom kan Article 11, Section 3(6) kan Konstitusyon, dapat ibase sa mga miyembro kan Senado na legal asin aktuwal na may kapasidad na makilahok sa mga pagdinig sa oras kan botohan.
Sinabi niya na an komputasyon dapat na dai kaiba an mga miyembro na:
Nakadetenir, suspendido, o kun paano man legal na napupugulan sa pagganap kan saindang mga katungdan bilang senador.
Mga tawong pinaghahanap kan mga awtoridad na dai aram an kinamumugtakan.
Nag-aagi sa pisikal o medikal na inkapasidad.
Lampas sa coercive processes kan Senado.
Iba pang kapareho an sitwasyon.
Sa kapinunan kan impeachment trial ni Bise Presidente Sara Duterte, nagdesisyon si Escudero na an conviction threshold dapat na itao sa 16 na boto o dos-tersyo kan 24 na miyembro kan Senado.
Alagad, hinagad ni Sen. Erwin Tulfo na baliktadon an desisyon ni Escudero, na sinambit na an apat na senador — Ronald dela Rosa, Jinggoy Estrada, Rodante Marcoleta asin Loren Legarda — haros dai nakakapartisipar sa mga proseso asin naghapot kun dapat pa sindang tugutan na magboto sa impeachment ni Duterte.
13 senador an nagboto pabor sa apela ni Tulfo, saro an nagkontra, asin anom an dai nagpartisipar.
Kaiba sa mga dai nagpartisipar iyo sinda Senador Alan Peter Cayetano, Pia Cayetano, Bong Go, Imee Marcos, Robinhood Padilla, asin Camille Villar.
