Naglaog na sa Philippine Area of Responsibility (PAR) an Bagyong Cempaka ngunyan na 8:40 nin aga, Lunes, Nobyembre 9, asin tinawan ini nin lokal na pangaran na “Samuel.”
An paglaog nin sarong bagyo sa PAR nangangahulugan na pinupuunan na kan Philippine Atmospheric, Geophysical and Astronomical Services Administration (PAGASA) an pagbantay digdi tanganing makatao nin regular na abiso sa publiko manungod sa posibleng epekto kaini sa nasyon.
Huring namansayan an sentro kan Typhoon Samuel sa rayong 1,370 kilometro Subangan Amihanan-Subangan kan Extreme Northern Luzon mantang naghihiro ini Amihanan-Amihanan-Sulnupan sa rikas na 20 km/h.
Igwa an bagyo nin maximum sustained winds na 120 km/h harani sa sentro asin gustiness na abot sa 150 km/h.
Sa ibong kan presensya kaini sa PAR, ipinahayag sa ulat kan panahon na hababa an posibilidad na direktang makaapekto an Bagyong Samuel sa pankagabsan na kamugtakan kan panahon sa nasyon sa bilog na forecast period.
Alagad, maski harayo an sentro kan bagyo, pwede pa man giraray ining magdara nin uran sa paagi kan pagpakusog kan hanging Amihan o pagbutong sa trough kaini, na nagdadara nin moisture sa darakulang parte kan kapuluan.
Huli kaini, magdadara pa man giraray nin mga uran ngunyan na aldaw sagkod Miyerkules, Nobyembre 11, an darakulang parte kan Luzon asin Visayas, pati na an Dinagat Islands, Surigao del Norte, Misamis Oriental, Camiguin, Lanao del Norte, Misamis Occidental, Zamboanga del Norte, Davao Oriental, Davao Occidental, asin Sarangani.
