NAGA CITY- LAOMAN an mas orog pang paglangkaw nin temperatura sa mga masunod na bulan. Ini an pigpatanid kan Agrometeorological station kan Pagasa sa banwaan nin Pili, Camarines Sur.
Sa entrevista kan Bombo Radyo Naga ki Ian Niel Nuñez, Officer in Charge kan CBSUA-Pili Agromet Station, sinaysay kaini na sa mga nakalihis na aldaw, nakapagrehistro an saindang opisina nin halangkaw na lebel kan heat index na maikokonsederar na peligroso sa salud kan mga tawo.
Sigun ki Nuñez kan nakalihis na Marso 2, nakapagrehistro sinda nin 43 degrees celsius heat index, 31 degrees celsius heat index kan Marso 3, 43 degrees celsius heat index kan Marso 4 asin 42 degrees celsius heat index kan nakalihis na Marso 5.
An nasambitan ng lebel maski nagbababa asin naglalangkaw an namamatean na temperatura kaipuhan pa man giraray na magin malikay an publiko tanganing dae magkahelang.
Sigun sa Pagasa, an heat index na nagpapakol sa 42ºC hasta 51ºC an maikokonsederar nang peligroso kun saen an heat cramps, heat exhaustion asin heatstroke an pwedeng mangyari.
Mantang an heat index man na nagpapakol sa 33ºC to 41ºC an pigkokonsederar extreme caution. Katakod kaini, an Agromet Station sa Pili, igwang pigpapaluwas na computed 5 days kan heat index kun saen kada oras soboot an saidang pag-obserbar.
Komo sulamenteng representante kan Pagasa sa probinsiya sinda man an igwang otoridad na magkua nin heat index na saindang ipapaluwas para sa kaaraman kan publiko.
Pigtawan duon pa kan opisyal na mainit talaga an panahon asin an alinsangan siringman an init kan temperatura na namamatean an huli pa sa Easterlies na nagdadara man nin isoldated rainshower asin thunderstorm sa nagkapirang parte kan Camarines Sur.
Mientrastanto, piglinaw man ni Nuñez na kan nakalihis na taon, saro an CBSUA Pili sa mga nakapagrehistro nin danger level kan heat index huli ta nasa La Nino alerto kaidto an nasyon.
Sa ibong na lado, nakatalaan na magpaluwas an Pagasa nin dry asin warm season kasabay kan ikukundusir na Climate Forum ngunyan na bulan kan Marso.
Sa ngunyan, pig-enkaminar na sana kan opisyal an gabos na pirmeng magpasiguro kan saindang mga sadiri asin mag-inom nin kadakol na tubig.
