Pigpahimutikan ni dismissed Bamban mayor Alice Guo na igwa nin nagtabang sa saiya na opisyal kan gobyerno asin Pilipino tanganing makatakas nin Pilipinas.
An pagsayuma ni Guo makalihis na kwestiyunon ni Senadora Risa Hontiveros asin Jinggoy Estrada sa pagdangon kan Senate Committee on Women and Children kun isay nagtabang sa saiya na makahali nin nasyon.
Pigsaysay kaini na yate an saindang piglunadan ninda Shiela asin Wesley Guo tanganing makatakas nin nasyon. Gikan sa sarong pantalan sa Manila an nagsakay sinda nin yate na sa saiyang tantya an antes mag alas-dyes nin pagkabanggi asin mga pirang oras, saka naglipat sa mas dakulang barko. Naghaloy soboot sinda sa dakulang barka nin tolo hasta limang aldaw kun saen nagtitinir sana sinda sa laog kan sarong kwarto.
Dae pigsapubliko ni Guo kun isay an maysadiri kan yate alagad pigsurat kaini sa sarong papel basado sa kamawotan kan mga senador kun isay an nagtabang sa saiya na makaluwas sa nasyon. Nagluwas na sarong Chinese national an nag-facilitate tanganing sinda an makatakas nin Pilipinas kan Hulyo.
Huli sa pirit na pagsayuma ni Guo na mayong nagtabang na Pinoy sa sainda, dae nagtutubod si Estrada asining sinabing imposible ini.
Mientrastanto, sinaysay man ni Senador Sherwin Gatchalian na importante na kasuhan an mga tawong nagtabang ki Guo na makadulag asin nagpatindog nin mga POGO hub tanganing padusahan sinda.
Sinaysay kaini na pitong kaso an isinangat kontra ki Guo asin nanindugan si Gatchalian na saro ini sa pinakahararom asin pinakagrabeng krimen kontra sa sarong tawo.
Si Guo madetenir pa sa Philippine National Police Custodial Center ngonian na pighahagad pa kan komite sa Korte asin sa Ombudsman na sa kustodiya kan Senado dapat an may kapot kan suspendidong alkalde. Alagad, sinaysay ni Estrada na sa oras na malipat sa Senado an kustodiya ni Guo, ipakukulong ini sa Pasay City Jail.
