NAGA CITY- Nagtutubod an Criminal Investigation and Detection Group (CIDG) na mas mapapapusog pa an pahayag kan anom na suspek sa paggadan ki Ako Bicol (AKB) Partylist Rep. Rodel Batocabe, sa tabang kan narekober suodmang armas na ginamit suboot sa krimen.
Sa entrevista kan Bombo Radyo Naga sinaysay ni PC/Insp. Ronnie Fabia, Chief kan CIDG-Albay asin nangenot sa operasyon suodma sa Barangay Sto. Niño, Pili, Camarines Sur, na kun magmatch an mga bala na narekober hale sa crime scene asin an cal. 45 na nakua sa septic tank sa harong ni Emmanuel Rosillo sa gigibuhong eksaminasyon, mas mapapapusog pa kaini an pahayag kan mga suspek manungod sa paggadan ki Rep. Batocabe.
Dawa mayong direktang epekto an narekober na armas sa pagkakaimbwelto komo mastermind suboot sa krimen ni Daraga, Albay Mayor Carlwyn Baldo, alagad sigon ki Fabia, maserbeng ‘physical evidence’ sa Batocabe slay an badil na ginamit kan gunman na si Rolando Arimado para maipahiling na totoo an testimonya kan anom na mga suspetsado.
Sa ngonyan, susog sa opisyal, haros 90% nang kompleto an saindang imbestigasyon sa krimen alagad kinakaipuhan pa nanggad nin mas hararom na pag-iimbestigar huli sa iba pang mga impormasyon manungod sa paggadan sa kongresista asin sa police escort kaini na si SPO2 Orlando Diaz.
