Aram baya nindo mga ka-Bombo, pighangaan an sarong 17-anyos na color guard na nagpadagos sa performance kan saiyang marching band dawa na nagputok asin nagdugo an saiyang kiray makalihis ining mapasala sa pagsalo kan flag.
Madadalan an video kan pagpeperform sa Wilson Marching Percussion, kun saen color guard an daragitang si Heart Carlos kan Parañaque City.
Estorya ni Heart, nangarag ini sa sarong parte kan pagtatanghal kaya ini nasala sa pagsalo kan flag asin nagtama ini sa saiyang kiray.
Dae naghaloy, pigpaluwas si Heart sa playing field tanganing bulongon an saiyang lugad.
Alagad para ki Heart, “the show must go on” dawa na pinipugolan ini huli sa pigsapong injury.
Tolong bulan pa sana si Heart sa grupo dawa haros siyam na taon na man ining naglalaban sa mga competition komo color guard.
Champion asin hakot awards man an saindang performance sa National Ensemble Competition kan Drum and Bell Corps Organization of the Philippines Inc.Labi an pasasalamat ni Heart sa mga naghanga sa saiyang netizens.
