NAGA CITY-Labi an nagin pagkabigla kan sarong pamilya makalihis na tamaan nin kikilat an saindang harong sa Nabua, Camarines Sur.
Sa entrevista kan Bombo Radyo Naga ki Dessa Cariño, nakasalbar sa pagtama kan kikilat, sinaysay kaini na dae ninda piglalaoman na maaapektaran pa sinda nin kikilat huli ta pigharali naman ninda an gabos na nakasaksak sa mga outlet asin mayo naman nin naggagamit nin cellphone sa laog kan saindang harong.
Alagad sulamenteng an router sana kan saindang wifi an dae ninda pighali huli ta huna ninda an dae naman idto delikado huli ta mayo man ini nin antenna sa luwas.
Labi man an nagin takot asin pagkabigla na saindang mamamatian kan madangog na sana nindang nagputok an router, mantang nahiling man soboot kan saiyang ama an pagkalap kan kikilat sa mga wires sa saindang harong.
Dugang pa ni Cariño kadakol man nin napasaan nin ilaw sa saindang lugar alagad pinagtutubudan na an saindang harong an pinakang nasentro kan kikilat.
Sa ngunyan, pagirumdom na sana kaini sa gabos na enkaso nagdadagoldol asin kikilat mas makakamarhay na ibaba na paramientras an breaker tanganing malikayan an siring na insidente.
