NAGA CITY- Salbado na ngunian an sarong bagong mundag na umboy makalihis ining ilubong nin buhay kan sadiring ina sa banwaan nin Goa, Camarines Sur.
Sa entrevista kan Bombo Radyo Naga ki PO3 Jordan Baduria kan Goa PNP, sinaysay kaini na nagreport sa saindang hepatura si Allan Celso Jr, residente sa lugar, makalihis kaining madukayan an sarong bagong mundag na umboy sa saindang lote.
Sigon ki Celso, alas 5:30 kasubagong aga kan makahiling siya nin nagwarak na dugo sa bakuran na tulos kaining sinundan hasta sa makaabot sa sarong sadit na kalot asin duman nadukayan kaini an sarong duguang umboy.
Tulos man suboot na idinalagan ni Celso sa Goa Municipal Infirmary an umboy makalihis maaramang naghahangos pa ini.
Meintrastanto, napag aramang pre-mature an babaeng umboy kun kaya paramientras man muna ining inilaag sa incubator.
Pigtutubudan man na sa lugar man mismo nag-labor an ina kan umboy huli na man sa mga dugong nagwarak sa lugar.
Sa ngunian, pinaghahanap na kan mga otoridad an ina kan umboy kun sain pwede suboot kaining kahampangon an kasong Attempted Infanticide.
