Nagsunad nin panibagong mga reklamong kriminal asin administratibo an kampo kan pamilya Duterte kontra sa haralangkaw na opisyal kan Marcos administration asin police officers sa Office of the Ombudsman ngunyan na Lunes, Setyembre 15.
Ini an may koneksyon sa pag-arestar kan saiyang ama na si dating Presidente Rodrigo Duterte sa Ninoy Aquino International Airport (NAIA) kan nakalihis na Marso 11 sa presenteng taon.
Sa 160 dahon nin affidavit complaint, inakusaran ni Davao City Acting Mayor Baste sinda Justice Secretary Jesus Crispin Remulla, DILG Sec. Jonvic Remulla, DND Sec. Gilbert Teodoro, NSA Eduardo Ano asin iba pang mga opisyal nin kidnapping, arbitratry detention, grave misconduct asin iba pang mga pagbalgar sa ley.
Pinangaranan man komo respondent sa reklamo sinda dating Philippine National Police (PNP) Chief Gen. Rommel Francisco Marbil, former Criminal Investigation and Detection Group Director Maj. Gen. Nicolas Torre III, Prosecutor General Richard Anthony Fadullon, DOJ Undersecretary Nicholas Felix Ty, asin ibang pulis asin justice officials.
Nakabugtak man sa reklamo na pagkaabot kan dating Presidente sa nasyon gikan Hong Kong kaiba an miyembro kan saiyang pamilya asin si dating Executive Secretary Salvador Medialdea an pwersahnag dinara sa Villamor Air Base, mahigot na binantayan nin pirang oras, saka inilupad pasiring The Hague sa Netherlands nin mayong due process.
Pinagkaitan man an dating Presidente nin tulos na access sa medical treatment sa ibong kan saiyang pigsasapo na seryosong diabetic condition.
Nagresulta man ini para ki Acting Mayor Baste na ipagpadagos an kaso huli ta nagtitinir pa man an saiyang ama na nakakulong sa ibang nasyon asin dae kayang magsunad kan dating Presidente nin mga kaso.
