PADAGOS an adbokasiya kan DICT-Camarines Sur sa pagtutulod asin pagsasagibo kan inaapod na “Bayanihan Sim Card Distribution”.
Obheto kan nasambitan ng proyekto na makatabang enot sa mga jovenes orog na sa mga estudyante tanganing magkaigwa nin matanos na access sa internet; makatabang man sa mga empleyado na mapadali an saindang mga ginigibo; magkaigwa nin matanos na komunikasyon an lambang saro; asin makanuod kan inaapod na innovation.
Sa entrevista kan Bombo Radyo Naga ki Engr. Zycar G. Ong, Provincial Officer kan DICT-Camarines Sur, sinaysay kaini na labi na mabibinipisyaran sa programang ini an mga magurang, mga obrero, mga nag-aadal asin lambang mga indibidwal na puhunan an komunikasyon.
Ini an huli ta an Sim na saindang ipigheheras, igwa nin 25 gigabytes na data, bastante para sa sarong bulan na mga gibuhon kan lambang saro. Sigun pa sa opisyal, halawig na an naabot kan saindang adbokasiya, kadakol na area o lugar an naherasan nin mga Sim Card sa bilog na Bicol Region puon Enero 2026.
Sa ngunyan, nagpagirumdom na sana an opisyal, na lugod magin responsable sa pakikipag-komunikar tanganing makalikay sa mga manlain-lain na huma siring kan scamming.
