NAGA CITY – Amay na nag-deploy nin mga personahe an BFP Pili sa mga sementeryo kan saindang banwaan para sa Undas 2025.
Sa entrevista kan Bombo Radyo Naga ki SFO4 Dennis Mendez Deputy Municipal Fire Marshal kan BFP-pili, sinaysay kaini na prayoridad kan saindang preparasyon an safety asin security kan publiko kun kaya nagkundusir sinda nin inisyal na inspeksiyon sa mga lubungan.
May pigpapautob na mga programa gikan sa regional asin national head quarters siring na sana kan response mechanism, fire extinguisher, asin first aid team enkaso magkaigwa nin insidente kan kasulo sa mga sementeryo.
Mientrastanto, dugang pa ni SFO2 Ricky Cezar Chief Operation kan BFP Pili nakalatag na soboot an daily deployment na nagpuon kan October 28 asin matapos sa November 2.
An saindang deployment yaon sa Pili Public Cemetery na igwang 3 personahe an naka-assign, 2 personnel man sa Anayan orog na ta piglalaoman an pagdagsa kan mga tawo partikular ta ini an nasa gilid sana kan tinampo.
An ibang mga personahe stand by sa main station sa posibleng insidente kan kasulo alagad igwa man nin piggigibong occular inspection tanganing enkaso igwang mahiling na peligro an tolos na makaresponde o tolos maaksyunan.
Sa ngunyan pagirumdom na sana kan duwa sa mga mapasiring sa sementeryo na siertuhon na mayong nawalat na nakasaksak na appliances sa harong orog na ta kadaklan sa mga pigpupuonan kan kasulo iyo an siring na sitwasyon.
Siringman dapat aram kan publiko an hotline number kan pinakaharaning fire statio o magwalat nin mensahe sa facebook huli ta nakatutok man digde permi an BFP-Pili.
