Makasa nin imbestigasyon an Bureau of Immigration (BI) katakod sa impormasyong nakabugtak sa sarong artikulo katakod sa self-confessed hitman asin soboot miyembro kan Davao Death Squad na si Edgar Matobato na nakaluwas nin nasyon gamit an pekeng identity asin travel documents, basado sa report gikan sa American daily newspaper na nakabase sa New York city.
Ipinublikar kaya sa nasambitan ng pahayagan an sarong artikulo kan nakalihis na semana na nagdedetalye kun pano nakahali nin nasyon si Matobato kaiba an saiyang pamilya. Dawa na dae na pigbanggit sa report kun kunsuarin nakaluwas nin nasyon an pamilya Matobato.
Nagibo soboot ni Matobato na makakua nin bagong identity kaiba an bagong pasaporte asin bagong job description komo hardinero.
Nakabugtak man sa report na nagbago ini kan saiyang pisikal na itsura sa paagi nin pag-shave sa saiyang mahibog na buhok asin pagsusulot nin dakulang salming sa mata, igwang gray goatee asin natahuban an parte kan saiyang lawgon nin mask.
Bako pang malinaw kun sisay an nagtao ki Matobato asin saiyang pamilya nin mga pekeng dokumento asin kun pano sinda nakaluwas nin nasyon na dae nag aagi sa immigration.
Magpuon soboot sa Pilipinas, nagpasiring sa Dubai an pamilya Matobato kun saen sinda nagbyahe man pasiring sa sarong dae natukoy na bansa kun saen piglalaoman na magbabagong buhay an pamilya kan nasa permanent exile.
Marurumduman, saro si Matobato sa mga enot na nagtestigo laban ki dating Presidente Rodrigo Duterte.
Kan nakalihis na bulan nin Setyembre taong 2016, inatubang ini kan nakatukaw pa kaidto na si Senator Leila De Lima sa imbestigasyon kan Senado katakod sa drug war killings tangani na tumestigo sa saiyang kaaraman dapit sa Davao Death Squad.
