Pigsierto kan Bureau of Immigration (BI) na pahihiguton an pagbabantay sa gabos nin international ports kan nasyon tangani masierto na mayong siisay man imbwelto sa kaso kan mga nawawarang sabungeros an makakaluwas nin Pilipinas.
Sigun ki BI Spokesperson Dana Sandoval, pigsugo ni Immigration Commissioner Joel Anthony Viado an mahigot na pagbabantay sa ibong kan kawaran pa nin Immigration Lookout Bulletin Order (ILBO) gikan sa Department of Justice (DOJ).
Mayo pa kaya sindang nareresiber na kopya kan ILBO, alagad komo pag-iingat, inatasan na kan Commissioner an gabos nin pantalan na bantayan an saindang biyahe.
Naenot na man na kinumpirmar kan DOJ na kabali sa mga kinasuhan kan mga pamilya kan nawawarang sabungeros an negosyanteng si Charlie “Atong” Ang asin man aktres na si Gretchen Barretto, na parehas pinahimutikan an mga akusasyon.
Natapos na soboot kan DOJ an pangenot na pagsisiyasat sa mga reklamong multiple murder asin illegal detention, asin pupuonan an na kan prosecution panel an preliminary investigation tangani matukoy kun igwa nin bastante na basehan tangani isunad sa korte an mga kaso.
Sigun ki Prosecutor General Richard Anthony Fadullon, mantang isinasagibo an imbestigasyon, pwedeng hagadon kan DOJ sa korte na magluwas nin Precautionary Hold Departure Order (PHDO) tangani man ulangan an siisay man kinasuhan sa paghali nin nasyon.
An ILBO an para sana kaya sa pagbabantay asin man pagrereport kun porbarang maghali nin nasyon an mga imbwelto, mantang an PHDO an igwa nin legal na kapangyarihang pugulan an saindang paghali.
Inanunsyar man an kumpletong listahan kan mga pangaran kan mga respondent sa kaso kun naipadara na kan DOJ an mga subpoena para sa preliminary investigation.
