NAGA CITY- Posibleng antes suboot magbaba sa saiyang pwesto si presidente Rodrigo Duterte sa taong 2022 maibwelta naman an operasyon kan Philippine National Railways (PNR) pasiring sa rehiyong Bicol.
Susog sa nagin pahayag ni Presidential Spokesperson Harry Roque, sarong Chinese company an makapot kan rehabilitasyon asin pagpapakarhay kan PNR.
Apwera digdi, nagtuga naman suboot an Chinese Ambassador to the Philippines na si Zhao Jianhua sa saindang ginibong pag-oolay na antes matapos an termino kan presidente, maibubwelta na an operasyon kan south railway system.
An rehabilitasyon para sa south railway system kan PNR na poon sa Paco, Manila hasta sa Matnog, Sorsogon an sinasabing pupondohan nin P175 bilyon na uutangon sa nasyon nin China na babayadan kan Pilipinas sa laog nin 20 taon.
Marurumduman na pirang taon naman poon kan mauntok an byaheng Manila-Bicol kan Bicol Express huli sa mga problema sa riles.
