NAGA CITY – Dead-on-arrival ang isang motorcycle driver matapos masalpok sa isang tricycle sa Zone 5, Brgy. Balatas, Naga City.
Kinilala ang binawian ng buhay na si Elmer Junson Caña, 19-anyos, residente ng Brgy., San Miguel, Bagong Silang, Puerto Princesa City.
Sa nakalap na impormasyon ng Bombo Radyo Naga sa Naga City Police Office, napag-alaman na habang binabagtas ni Leonel San Juan, 36-anyos, residente ng Z-5 Balatas, sa naturang lungsod, nang aksidente itong masalpok ng motorsiklo na minamaneho ni Caña.
Sa inisyal na imbestigasyon ng mga awtoridad, nabatid na tila kinain nito ang linya ng kasalubong na tricycle.
Dahil sa lakas ng impact nagtamo ng mga sugat sa iba’t-ibang bahagi ng kaniyang katawan si Caña na agad namang dinala sa ospital para sa asistensya medikal ngunit idineklara ring dead-on-arrival ng mga doktor.
Sa ngayon, nagpapatuloy pa rin ang isinasagawang imbestigasyon ng mga awtoridad hinggil sa nasabing insidente.
