Kinakahampang kan sarong 18-anyos na lalaki an kasong murder asin attempted murder kasunod kan fatal sword attack sa sarong high school sa Fagersta, Sweden, na ikinagadan nin sarong estudyante asin ikinalugad nin tolong iba pa.
Kan Biyernes, Agosto 21, inaresto an binatilyo sa laog kan Brinell School.
Segun sa Swedish prosecutors, nabadil an suspek matapos ining manlaban kan isinasagibo an pag-aresto.
Nakasulot nin helmet an lalaki asin may darang espada kan isagibo an pag-atake.
Binisto kan pulisya an nagadan bilang sarong 17-anyos na babae mantang tolong lalaki man an nalugadan, asin duwa sa mga ini an nasa kritikal na kondisyon.
Padagos an imbestigasyon kan mga awtoridad tanganing maisihan an motibo sa pag-atake.
May dati nang kaso an suspek na may koneksyon sa assault.
Sinusuri man kan mga imbestigador an sarong TikTok account na ikinokonektar sa suspek.
Antes ining maghali, nanutaran suboot digdi an nagkapirang video na may koneksyon sa mga school attack asin sarong ritrato nin espada.
Mientrastanto, suspendido pa an operasyon kan naturang eskwelahan asin mahigot na minamatyagan kan pulisya an lugar.
Sigun ki Police Chief Tommy Alriksson, nakapagsagibo na an mga awtoridad nin haros 80 interviews asin plano nindang kaulayon an haros gabos na staff asin estudyante kan eskwelahan na kinakarkulong umaabot sa 450 katawo.
