Nangapudan an Bureau of Internal Revenue sa publiko partikular sa mga retailers o nagtitinda nin mga produktong vape na surion na marhay an saindang mga pigpapabakal.
Inihayag mismo kan presenteng commissioner kan Bureau of Internal Revenue na si Commissioner Romeo D. Lumagui Jr. an saindang pangapudan sa mga negosyante na hilingon kun lehitimo an mga kapot nindang vape products.
Kun pinapagirumduman kaini an mga paratienda na iparehistro an saindang mga negosyo sa Department of Trade and Industry tangani magin ligal an pagtitinda.
Siringman an saiyang pagirumdom na dae malingaw na magbayad kan mga kaukulang buwis partikularmente nin excise tax sa mga produktong pinapabakal.
Mahigot na patanid kaya ni Commisioner Romeo D. Lumagui Jr. sa publiko na dae sinda maduwang isip na habulon an mga nagbabalgar sa ley.
Soboot seryoso sindang masunad pa nin mga kaso enkaso na madiskubre na iligal an operasyon kan sarong negosyo.
Mientrastanto, inihayag man kan nasambitang commissioner na pwedeng i-surrender kan mga negosyante sa saindang opisina an mga produktong vape na dae soboot lehitimong ipapabakal .
Kun saen kasabay kan saiyang patanid, pinag inkaminar kaini an publiko partikularmente sa mga negosyante na pilion an mga lalaugon na negosyo asin likayan man an pagpapabakal pa nin mga produktong bigong bayadan an excise tax.
Marurumduman na kansuarin sana ay nagpasiring an nasambitang commissioner sa Department of Justice tangani sunadan nin multiple tax evasion case an pirang kumpanya na dae nagbabayad nin buwis.
