Nagdeklarar na nin state of calamity an Bohol Provincial Government huli sa padagos na paglangkaw kan mga kaso nin dengue sa probinsya.
Pigrekomendar ini kan Sangguniang Panlalawigan sa Bohol Provincial Anti-Dengue Task Force huli sa nagin marekas na pagdakol kan kaso sa probinsya asin tangani na man makapagpreparar nin marhay an mga namamanwaan kan Bohol.
Sa inisyal na report kan provincial health office kan Bohol, pigkakarkulong naglangkaw na sa 5,839 an kabilugang numero kan nairehistrong kaso sa probinsya puon kan Enero hasta Agosto 24 ngunyan na taon kabali digdi an 14 na death cases gikan sa helang.
Huli sa biglaang paglobo kan numero kan mga kaso, nagheras an 10 government-managed hospitals sa probinsya nin mga suplay kan intravenous fluids asin non-structural protein 1 o NS1 kits tanganing magamit kan mga pasyente kontra dengue.
Mientrastanto, huli na man sa deklarasyon kan state of calamity sa lugar, piglalaoman na an mga residente an magsagibo nin mga clean up drive asin mas marhay na maagap sa pagpapakonsulta sa mga klinika asin ospital enkaso nakakamate man nin sintomas na dara kaini.
