NAGA CITY- Pigheras kan Barangay Kapitan kan Bikal, Libmanan, Camarines Sur na dakulang problema an relocation site para sa mga naapektaran na residente sa naraot na tinampo sa may parte kan Maharlika Highway.
Sa entrevista kan Bombo Radyo Naga ki Erning Espiritu, Barangay Kapitan ng Brgy. Bikal, Libmanan, Camarines Sur, sinaysay kaini na huli sa mayong mababalyuhan an mga apektadong residente dae nalilikayan na liwat magbwelta an mga ini sa area maski mahigot na ipinagbabawal huli ta igwang posibilidad na dagusang magrasay an gabos na parte kan tinampo orog na kun mayong untok an pag-uuran.
An nasambitan soboot na problema an dapat na masimbagan tolos nin huli ta kainakaipuhan na sa presente, alagad nasasabutan man kan opisyal na igwang proseso na dapat sunudon sa mga siring na problema.
Kasabay digde, liwat man na pigsierto kan opisyal na salbado ang saindang lugar para sa mga motorista nin huli ta sa presente, padagos man an pagtatrabaho kan DPWH-Bicol, LGU-Libmanan asin iba pang opisina tanganing masierto na dae dagusang ma-collapse an nasambitan ng tinampo.
Sa ngunyan, pig-enkaminar na sana kan opisyal an gabos na mga motorista asin saiyang mga nasasakupan na magsunod sa mga pigtakda na abiso dapit sa nasambitan ng insidente.
