NAGA CITY- Pigtawan duon kan pamayuhan kan NFA-Camarines Sur na nagtitinir na bastanteng marhay an saindang suplay kan paroy sa presente.
Sa entrevista kan Bombo Radyo Naga ki Marbin Malabanan, OIC, Branch Manager kan NFA-Camarines Sur, sinaysay kaini na marhay para sa mga paraoma an dry season o namamateang init kan panahon sa ngunyan orog na ta nasa harvest season na an mga local farmers kan saindang itinanom.
Sigun pa ki Malabanan, kadakol na mga paraoma an nagdadara nin paroy sa saindang opisina na rason tanganing magin bastante an saindang buffer stock.
Alagad, saro man sa kinakahampang na problema kan NFA-Camarines Sur an kakulangan sa warehouse na pagbubugtakan kan saindang binabakal na paroy gikan sa mga paraoma.
Katakod digde, pigsaysay man kan opisyal na padagos an saindang paghahanap nin mauupahan na warehouse siring na sana sa may parte kan Pili, Tigaon asin Naga.
Oras na magbukas na an mga nasambitan ng warehouse, pwede na liwat mag-ako nin mga paroy an NFA. Sa presente, nagpakol sa nasa 400-k bags kan paroy an naka-imbak sa warehouse kan NFA na kun saen piglalaoman pa na madudugangan nin huli ta ma-peak pa sana an harvest season sa bulan kan Mayo.
Pigsierto man kan opisyal na dagos-dagos an saindang milling tanganing mabawasan na an saindang imbak na paroy asin tanganing maakomodar an mga paraoma na mawot magpabakal kan saindang inaning paroy.
Mientrastanto, pigheras man kan opisyal na igwa sindang pigko-konstruher na dakulang warehouse sa may parte kan Libmanan, kun saen sa presente ini an on-going asin aabuton pa nin haros 7 bulan antes na makumpleto.
Sa ngunyan, hagad na sana kan opisyal an pag-intindi kan publiko asin nagpromesa na piggigubuhan na ninda paagi tanganing masimbagan an problema.
