NAGA CITY – Nagpanduwa an probinsya kan Camarines Sur sa igwa nin pinakahalangkaw na kaso kan stunting o pagkabansot sa enterong Bicol Region.
Sa nagin patara-tara ni Arlene Reario, Regional Nutrition Program Coordinator, National Nutrition Council Region 5, sinaysay kaini na nangengenot an probinsya kan Catanduanes na igwa nin 15% asin panduwa digdi an Camarines Sur na igwa nin 14.59% na pigsunudan man kan Masbate.
Sa mga banwaan man na nakapagrehistro nin pinakahalangkaw na numero kan mga bansot na aki kadaklan digdi an gikan sa Camarines Sur.
Posible man soboot sa rason kaini an huli sa pagigin dakula kan probinsya asin dakula man an populasyon kan mga kaakian.
Dugang pa ni Reario, an pagsimbag sa malnutrisyon an dae kakayon na simbagan kan sarong ahensya sana kun kaya napakaimportante kan pagkakaigwa nin marhay na koordinasyon asin lakdang gikan sa mga lokal na gobierno.
Sigun pa digdi na baku sanang an pagtatao nin kakanon an dapat na gibuhon kan mga LGU kundi magin an pag secure sa mga food security issues sa paagi kan pakikipagtabangan sa Department of Agriculture.
Pinag-urgulyo man kan opisyal na nagdadakol na sa mga local chief executives an nagtatao nin importansya sa salud kan mga kaakian sa saindang mga nasasakupan asin dae na kaipuhan pa na pagirumduman an mga ini.
Ikinaogma man kaini na an mga Bikolano an baku man na dipisil na tukduan pag-abot sa pagprotehir sa saindang mga salud kun kaya kaipuhan sana nin tama asin marhay na paggiya sa mga ini.
