NAGA CITY- Pig-orgulyo kan sarong dean sa CBSUA Pili an halangkaw na passing percentage kan Unibersidad pag-abot sa ladangan kan edukasyon.
Sa entrevista kan Bombo Radyo Naga ki Associate Prof. Karen B. Perez, Dean College of Developmental Education- CBSUA Pili, sinaysay kaini na nag-abot sa 650 gikan sa apat na campuses an nakapasar asin naging newly licensed teachers para sa elementary asin secondary kun saen an 146 digde an gikan sa Pili Campus.
Sigun ki Perez, kadakol na mga paagi an binilog kan saindang unibersidad partikular sa saindang programa tanganing mamantinir an halangkaw na passing percentage.
Kabali na digde an marhay na academic residence kan mga paratukdo. Boot sabihon, padagos an pagpapauswag sa an faculty profile tanganing mas magin capable na makapagheras nin mga dugang na impormasyon.
Apwera digde, yaon an man an sarong programa na pigdugang kun saen pwede nang mag review an mga estudyante antes na magluwas nin Unibersidad.
Siringman igwang mga estudyante na nagse-self review o naglalaog sa mga review centers para mas halangkaw na tsansa na makapasar.
Dugang pa kan opisyal, padagos man an saindang pag-enkaminar sa mga estudyante na tibayan mantang yaon pa sa laog kan Unibersidad tanganing maabot an mga kamawotan sa buhay.
Mientrastanto, pigsaysay man ni Perez na sainda nang nilaoman na kadakol an mapasar gikan sa saindang Unibersidad orog na ta matitibay man an saindang mga estudyante.
Sa ngunyan, padagos an pagbilog nin programa kan CBSUA-Pili partikular sa lado kan edukasyon tanganing makapagkriar nin mas produktibo asin matitibay na mga professional.
