NAGA CITY – Nakikipagkoordinar na an pamayuhan kan City Disaster Risk Reduction Management Office baku sana sa mga kapulisan kundi sa publiko katakod kan mga preparasyon na saindang piggigibo para sa nagdadangadang na selebrasyon kan Peñafrancia Festival.
Sa entrevista kan Bombo Radyo Naga ki Ernesto Elcamel, pamayo kan CDRRMO, sinaysay kaini na nagpuon na ngunyan na aldaw asin madurar hasta sa aga, Hulyo 11 an pigkokondusir na simulation exercises kan saindang lado.
Sa aktibidad na ini ipapahiling kun paano ninda gigibuhon o eexecute an mga preparasyon na saindang pigsasagibo.
Kabali man sa mga pinagpeprepararan kan mga ini an posibleng paglubog kan PAGODA, stampede, bombing, fire incident, asin posibleng shooting incident.
Alagad dakul pa an kulang kaini asin dae pa man idto perpekto kun kaya padagos pa ninda ining pinag-aadalan asin mabase sinda sa magigin opinyon kan mga residentes tanganing mas orog ining ma-improve.
Saro an posibleng paglubog kan PAGODA sa saindang babantayan huli ta luma na ini asin aaramon pa ninda kun sisay an nagmomonitor kaini magin sa iba pang water craft.
Sa ngunyan, magpapadagos pa an pigsasagibong preparasyon kan saindang lado para sa nagdadangadang na mga kasiributan sa syudad nin Naga.
