Iimbestigaran kan Commission on Human Rights (CHR) an nangyaring engkwentro kan Abril 19 sa Barangay Salamanca, Toboso, Negros Occidental na nagresulta sa pagkagadan kan dai mababa sa disi nuwebeng indibidwal, kabale an student leader na si Alyssa Alano asin community journalist na si RJ Nichole Ledesma.
An CHR team sa Negros Island Region nagpapadagos na nin independienteng imbestigasyon.
An CHR nagkondusir kan separadong imbestigasyon kasunod kan pag-obserbar nin mga pagkakaiba sa mga identidad kan mga nagadan.
Mantang an Pwersa Armada kan Pilipinas (AFP) nagmamantinir na an mga nagadan mga miembros kan NPA, an ibang mga organisasyon nag-asegurar na an nagkapira sa mga biktima, kabali si Alano asin Ledesma, mga sibilyan na naggigibo nin trabaho sa komunidad.
Susog sa CHR, sa irarom kan International Humanitarian Law (IHL), dawa sa konteksto nin bakong internasyonal na armadong iriwal, an mga parapakilaban asin sibilyan dapat na midbidon.
