NAGA CITY – Pigkondusir an aktibidad asin programa kan Committe on Agriculture sa barangay Balogo, Pasacao, Camarines Sur katakod kan nutrition month.
Sa entrevista kan Bombo Radyo Naga ki Arnel Ama, Committe on Agriculture asin Barangay Kagawad kan nasambitan ng lugar, pigsaysay kaini na ngunyan na bulan, nagkakaigwa sinda nin pacontest katakod kan saindang programa na clean and green asin gulayan ni Nanay na papartisiparan man kan kada grupo sa saindang zona kan saindang barangay.
Sigun ki Ama, nagheras soboot ini nin mga seeds sa mga residentes nin huli ta kamawotan kaini na igwa nin backyard garden an lambang harong.
An nasambitan naman na programa an magpapadagos-dagos tanganing maenkaminar pa an mga residentes na magtanom bako sanang huli sa kafiestahan kan saindang barangay.
Ini man an saro sa programa na tanganing maimbetiran an malnutrasyon sa mga kaakian nin huli ta kaidto soboot igwa nin nairehistro kan siring ka kaso sa mga Badjao.
Mientrastanto, nanutaran man soboot ni Ama na kulang sa gulay an saindang barangay kun kaya padagos an saindang pag-enkaminar sa mga residentes na magtanom tanganing makatabang na mabawasan an saindang pang-urualdaw na gastuson, siringman, makakatabang man ini para sa ikakagayon kan saindang kapalibotan.
