Ipigheras kan sarong dating Konsehal an impormasyon dapit sa pagkundusir kan Fluvial Procession sa Banwaan nin Sagñay, Camarines Sur.
Sa intrevista kan Bombo Radyo Naga ki Noe Sorito, dating konsehal kan nasabing banwaan, sinabi kaini na poco mas o menos 18 taon nang piggigibo an fluvial procession bilang parte kan tradisyon asin debosyon kan mga taga Sangay.
Dugang pa ni Sorito, sakop kan patrona an sampulong barangay sa saindang lugar kun kaya padagos na nagtatalubo an debosyon asin pakikisumaro kan mga residente sa nasabing selebrasyon.
Saro pang nahihiling na importansya kan fluvial procession iyo na ini nagtatao nin pagkakataon sa mga deboto na maipahiling an saindang pagtubod na dae na kaipuhan magbyahe pasiring sa Ciudad nin Naga.
Nin huli an nagkapirang parte kan Sangay harayo sa ciudad, an lokal na prusisyon nakakatabang na mairani sa mga deboto an selebrasyon para ki Ina Peñafrancia asin nagtatao sainda nin pagkakataon na makisumaro sa tradisyon.
Mientrastanto, tinawan man nin duon an kahalagahan kan tunay na pagtubod asin pagsarig sa Kagurangnan sa buhay kan lambang tawo.
Dugang pa ni Sorito na ano man na relihiyon an kinabibilangan nin sarong indibidwal, importante man giraray na igalang an pagtubod kan lambang saro, nangorogna kun dapit sa sadiri nindang mga tinutubod.
Sa pagpadagos kan tradisyon na ini, bako sanang debosyon an ipinapahiling kundi pati an pag-apresyar sa pagkasararo, paggalang, asin pagtubod kan mga tawo sa Sanga.
