Nagtakda an Commission on Elections (Comelec) nin mga rules para sa pagsasagibo kan Sangguniang Kabataan special elections (SKSE) tanganing panuan an ginatos na bakanteng posisyon sa mga community council sa bilog na nasyon.
Pigsaysay man ni Comelec Chairman George Garcia na an pagkakaigwa nin kumpletong membership sa Sangguniang Kabataan (SK) an mandato sa irarom kan ley.
Sigun pa sa Comelec chair, an SK an nagrerepresentar sa mga kajovenan sa konseho asin an non-representation kaini an boot sabihon na dae madadangog an boses o pangapudan kan mga kajovenan.
Mahihiling sa datos kan Comelec na igwang 139 asin 553 na bakanteng posisyon para sa mga SK chairmen asin members, nin huli ta mayong nagkandidato para sa nasambitan ng mga puwestong kan May 2023 elections.
Sa irarom kan bagong rules, posibleng magsagibo nin special elections an Comelec enkaso an numero kan mga opisyal kan SK na na-elihir an mas hababa sa kinakaipuhan na quorum, enkaso mayong nagsunad nin kinakaipuhang certificate of candidacy, o mayong kwalipikadong kandidato.
An sertipikasyon an dapat magsaysay nin mga ground o batayan para sa pagsasagibo nin special election asin an mga posisyon na kaipuhan na panuan. Dapat man na isumiter muna an certification sa office of the provincial election supervisor.
Mientrastanto, an opisina kan regional election director an dapat pagsararuon an mga report asin dapat isumiter sa opisina kan Comelec kan executive director for operations.
An mga naelihir sa Sangguniang Kabataan special elections an magseserbe sa natatadang termino kan mga bakanteng pwesto.
