Preparadong pangenotan ni Philippine National Police (PNP) Chief PGen. Nicolas Torre III an paghahanap sa bangkay kan mga sabungero na iyong nawawara apat na taon na an nakalilihis asin dae soboot piglubog sa Taal Lake.
Sigun ki Police Regional Office III Director asin PNP Spokesperson PBGen. Jean Fajardo gagamiton ninda an mga naging pahayag asin rebelasyon kan pigkokonsiderar na state witness asin whistle blower sa kaso na si alyas “Totoy” tanganing liwat mapuonan an imbestigasyon sa pagkawara kan mga sabungero.
Pigkokonsiderar man kan PNP na sarong dakulang development an mga pahayag na ini ni Totoy tanganing tulos na maresolbaran asin matawan nin hustisya an mga sabungero magin an mga pamilya kaini.
Dawa sarong dakulang breakthrough sa kaso an rebelasyon, nagtitinir na sarong dakulang anggat para sa PNP an paghahanap sa mga lawas kan mga sabungero orog na ta nasa 34 na mga bangkay an nakatalaan nindang hanapon sa mahewas asin hararom na Taal Lake.
Kasunod kaini, nakapreparar man an saidang kapulisan na magtao nin police assistance sa naglataw na witness tanganing masierto an seguridad asin kasalbadohan kaini.
Mientrastanto, nakatalaan man na makipagkoordinar an PNP sa bagong witness para man mahagadan ini nin opisyal nin mga pahayag na iyong magagamit sa paghahanap sa mga nasambitan ng bangkay.
