NAGA CITY – Pigkundusir ngunyan na aldaw nin Biyernes, Nobyembre 29, 2024 an culminating activity manungod sa Children’s report sa siyudad nin Naga, katakod sa pagselebrar kan National Children’s Month.
Sa nagin paghampang sa mga kagawad kan media ni Elmer Baldemoro, Naga City Childrens Affairs Office Executive Director, sinaysay kaini na taon-taon soboot ining piggigibo huli ta importanteng kada taon magkaigwa nin report si Naga City Mayor Nelson Legacion manungod sa accomplishment sa mga kaakian tanganing ma-update kun ano talaga an mga status kan nasambitan ng sektor sa siyudad nin Naga.
Katakod digde, pigkundusir man sa culminating activity an awarding sa passer sa barangay council for the protection of children na Kun saen pigsabay na kan DILG an seal of good local governance sa barangay asin matao man certificate an nasambitan ng ahensiya sa mga pasadong barangay.
Dugang pa ni Baldemoro, in placed na soboot an mga programa siring kan program on health, education asin protection asin mas pinpusog na partisipasyon kan mga kaakian kaya man na-organize an barangay children association sa 27 barangay sa siyudad nin Naga asin pig-federate kan Naga Children Federation.
Kun manunutaran kan nakalihis na mga aktibidad sa mga barangay asin siyudad nagpupuon sa mga joven o youth alagad ngunyan ini nagpupuon na sa mga kaakian, asin ini nagseserbeng training ground huli ta an mga nasambitan ng mga aki an pwedeng magin future leader kan saindang barangay.
Sigun pa ki Baldemoro, kun tatawan giraray soboot ining oportunidad na elehir mas marhay na ipadagos an mga programa sa mga kaakian huli ta kinakaipuhan kaya an new legislation na makakatabang sa pag-implementar kan mga programa.
Mientrastanto, mawot man ni Baldemoro na mas pahewason an pag-rescue sa mga kaakian na yaon sa gilid kan tinampo huli ta maski na ini pirming piggibo kan CSWD alagad an mga nasambitan ng aki mas naeenganyo na yaon sa mga gilid kan tinampo asin bako na soboot ini an mga tunay na street children, huli ta an mga street children yaon na sa Naga City Children’s Hall.
