Lininaw kan sarong abogado na an pagkaigwa nin utang sarong klase nin kontrata kun saen an parautang asin an nagpapautang igwa nin mga deretso asin obligasyon. Segun saiya, dawa ngani igwa nin deretso an nagpapautang na magkolekta, dapat na gibohon ini sa paaging susog sa ley asin bako sa paagi nin pananakot o pang-harass.
Sa intrevista kan Bombo Radyo Naga kay Atty. Anne Chua (Civil and Criminal Lawyer), sinabi kaini na mayo nin siisay man na pwedeng makulong huli sana sa dai pagbayad nin utang. Alagad, an mga kasong kriminal pwedeng isampa kun an utang may kalabot na pandadaya o pagbalga sa ibang mga ley, arog kan estafa o pagbalga sa Bouncing Checks Law.
Katakod kaini, nagpatanid an abogado kontra sa mga abusadong paagi nin pagkolekta, kabali na an pagpost sa social media ngani na ipasupog an may utang, pag-apod sa mga paryentes o amo, asin dae awtorisadong paggamit nin personal na impormasyon. Pwede suboot na magresulta sa cyber libel, harassment, asin pagbalga kan Data Privacy Act an mga siring na aktibidad.
Ipinaliwanag man na dai pwede basta-basta kuanon kan nagpapautang an pagsasadiri kan may utang na mayong due process. Kaipuhan na mag-agi sa mga legal na lakdang arog kan pag-agaw o aksyon sa korte.
Mientrastanto, an ley igwa nin itinalaan na peryodo nin panahon na sa laog kaiyan an sarong utang pwedeng ipagpadagos—10 taon para sa mga nakasurat na kasunduan asin 6 na taon para sa mga berbal na kasunduan. Pwede ining maatraso kun an sarong kaso isinangat o an nagpapautang magpadara nin sarong surat nin kahagadan.
Para sa mga nadedepisilan sa pagbayad, isinusuherir na makipag-olay sa nagpautang tanganing pag-olayan an pag-restructure kan utang, kaiba an pagbawas kan installment o pagpalawig kan panahon nin pagbayad.
Tinawan nin duon kan abogado na dawa mayo nin bilanggoan para sa simpleng utang, an obligasyon na ini nagdadanay bilang sarong paninimbagan sibil. Sa rason na ini, pig-eenkaminar an publiko na magin maingat asin responsable sa paglaog sa anuman na kasunduan pinansyal.
