Nagpakol na sa P121.88 milyon an total na danyos sa sektor kan agrikultura huli sa pinagsararong epekto kan Bagyong Crising asin hanging habagat.
Sa report na pinaluwas kan Department of Agriculture – Disaster Risk Reduction and Management Operations Center kasuudma, Hulyo 22, nasa 7,911 ektarya nin mga omahan an apektado, na may labi sa 1,300 ektarya an totally damaged.
Ini an nagin kawsa kan pagkaraot kan mapakol sa 3,075 metric tons kan manlaen-laen na agri products asin apektado an total na 6,377 na paraoma asin parasira.
An dakulang porsyento kaini an gikan sa industriya kan paroy na nag-abot sa 90.51% mantang an natatada nababanga sa mais, high value crops, poultry, fisheries, asin iba pa. Mayor na apektado an mga paroyan sa probinsya kan Cagayan, Tarlac, Bataan, asin Negros Occidental.
Nagtitinir man na available an kabilogang P495 milyon na kantidad nin agri inputs an available sa DA regional offices na pwedeng iheras sa mga paraomang apektado sa kalamidad.
Segun sa DA, nagsasagibo man nin assessment an mga field offices kan Philippine Crop Insurance Corporation (PCIC) para sa mga paraoma na dati nang nag-insure kan saindang mga omahan.
Pigsierto kan ahensya na preparado na an bastanteng pondo para sa insurance claims kan mga paraoma.
