NAGA CITY- Nahahampang ngonyan sa kaso an dating alkalde kan banwaan nin Pili, Camarines Sur siring man an iba pang mga opisyal asin empleyado kan gobyerno makalihis na magsunad nin reklamo an sarong taxpayer sa Office of the Ombudsman.
Sa nakuang impormasyon kan Bombo Radyo Naga, napag-araman na nahahampang si dating Pili Mayor Alexis ‘Nonoy’ San Luis II, si incumbent Vice Mayor Dr. Rogelio Raymund Regondola asin an walong mga incumbent municipal councilors kan nasambitang banwaan sa kasong pagbalgar sa RA 3019 o an Anti-Graft and Corrupt Practices Acts asin an pagbalgar sa RA 6713 o an Code of Conduct and Ethical Standards for Public Officials and Employees.
Apwera sa nasambitang mga opisyal, nahahampang man sa parehong kaso an nagkapirang mga dating empleyado kan lokal na gobyerno asin an kompanya na B2B Pricenow.Com, Inc. na nagkakapot sa proyekto.
Nag-poon an kaso sa maanomalya suboot na automation project sa nasambitang banwaan na nagpoon pa kan taong 2014 sa irarom kan administrasyon ni San Luis na hasta sa ngonyan dae pa napapakinabangan kan gobyerno.
Basado man sa reklamo, nagpaluwas na nin awad-awad na kantidad nin kwarta an lokal na gobyerno para sa proyekto.
Obheto kuta na kan nasambitang automation project na maparikas an mga transaksyon sa munisipyo.
Apwera man sa nasambitang pagbalgar kan mga akusado, nahahampang man sa kasong igwang kinaaraman sa pagbalgar sa Omnibus Election Code asin conduct prejudicial to the best interest of service, grave misconduct asin gross neglect of duty an mga ini.
Sa ngonyan, yaon na sa opisina kan Ombudsman an kaso tanganing magkaigwa nin maninigong imbestigasyon.
