Nagluya na soboot an lawas asin man nagin haros buto’t balat na sa kapayatan si dating Presidente Rodrigo Duterte makalihis an apat na bulang pagkakakarsel sa The Hague, Netherlands.
Ini an inihayag ni Elizabeth Zimmerman, dating misis ni Digong sa saiyang facebook post na pigheras ni dating Presidential spokesman Harry Roque sa pagbisita kaini ki Digong sa detention center kan International Criminal Court (ICC).
Sinaysay ni Zimmerman na bagaman maayos man an salud ni Digong, dakula an ibinagsak kan timbang kaini.
Si Duterte an presenteng nasa kustodiya kan ICC katakod kan kasong “crimes against humanity” sa madugong giyera kontra droga. Nakatalaan an kumpirmasyon kan kaso kontra digde sa Setyembre 23, 2025.
Sigun pa ki Zimmerman, si Duterte, nagluya na an lawas asin man maluya na kun maghiro bagaman mayo ining iniinom na ano man na maintenance na bulong.
Nagpapalipas nin oras an Dating Presidente sa paaagi kan pagdadalan nin television sa saiyang selda asin man pag-obserbar nin klima sa Netherlands.
Inihayag pa kaini na nagtitinir na nasa “good spirit” an dating Presidente.
Marurumduman na si Digong an inarestar sa Ninoy Aquino International Airport makalihis ining mag abot sa nasyon gikan sa political rally sa Hong Kong kan nakalihis na bulan nin Marso.
