NAGA CITY – Piglatag kan Department of Education (DepED)-Camarines Sur an manlaen-laen na interbensyon sa pagpapauswag kan literacy kan mga estudyante.
Sa entrevista kan Bombo Radyo Naga ki Atty. Salvador Bogs Pelingon, Division Information Officer, DepEd- Camarines Sur, sinaysay kaini na nagkapirang estudyante sa probinsya an nadidipisilan o igwa nin hababang level pag-abot sa reading comprehension na saro man sa pigtututukan kan DepEd.
Komo interbensyon digdi, kaipohan soboot pakusugon an literacy week para sa mga estudyanteng nasa Grade 1 hasta Grade 3. Dugang pa digdi an summer program para sa incoming grade 4.
Igwa man sinda nin Learning Action Cell (LAC) session, kun saen, matraining an mga paratukdo kun pano ma-enhance an saindang teaching practices, siringman, tanganing ma-address an mga huma na kinakahampang sa laog kan eskwelahan orog na sa mga estudyante.
Apwera pa digdi, pigsasagibo man an summer remedial classes asin project aral.
Katakod kaini, pigpagirumdoman na sana ni Pelingon an mga paratukdo sa saindang content standard asin assessment tanganing aram talaga kan mga ini an saindang pigtutukdo asin tanganing maaaraman kun nakakanood an mga estudyante.
