Sinaysay ni Department of Education (DepEd) Sec. Sonny Angara na naghagad ini ki Philippine National Police (PNP) chief, Gen. Nicolas Torre III para sa mas pinahigot na police visibility tangani labanan an kadahasan sa mga eskwelahan.
Kan nakalihis na aldaw, nag-courtesy visit si Torre ki Angara sa DepEd Main Office sa Pasig City.
Sa social media post, sinaysay ni Angara na tangani masierto an kasalbaduhan kan lambang mga estudyante asin empleyado, kahagadan ninda an mahigot na police visibility sa lambang mga school vicinity asin man an posibilidad nin capacity-building sa first responders kan mga barangay asin eskwelahan.
Sa magkasuhay man na pahayag, pinag-ulayan man kan PNP an five-minute response policy kaini kaiba an DepEd.
Pig-isplikar ni Torre an mga inisyatibo tangani masimbagan an padagos na pagdakol kan kaso nin bullying asin iriwal sa mga eskwelahan, na kun saen pig inkaminar kaini an lado kan DepEd tangani mamantinir an open line kan kumonikasyon sa PNP.
An nasambitan ng pag-ulay ninda Angara asin Torre an kasunod kan direktiba kan ahensya sa mga eskwelahan sa bilog na nasyon na pakusugon an security measures kasunod kan nangyaring pambabadil sa laog mismo kan eskwelahan sa Nueva Ecija.
