Nagpatanid an Department of Health (DOH) sa posibleng disease outbreaks sa Pilipinas kun matinir na hababa an vaccination rates. Ini an makalihis na mairehisto kan Pilipinas an hababa sa 95% target kaini para sa Full Immunization Coverage (FIC) kan naklihis na taong 2024.
Sa sidelines kan National Immunization Summit, pigtukoy ni Health Assistant Secretary for the Public Health Services Cluster Farwa Hombre an vaccine hesitancy komo mayor na rason para sa hababang immunization rates sa nasyon.
Pig amin man kaini na nakakaapektar sa pagbaba kan tiwala kan publiko sa mga bakuna an kontrobersiya sa Dengvaxia vaccines, an bakuna kontra dengue.
Nagpatanid man an opisyal na kun mabigong maabot an 95% target pwede ini na mag hantong sa liwat na paglitaw kan mga helang na dati nang nakontrol. Pigtawan duon man ni ASec. Hombre na an ibang bakuna sa irarom kan National Immunization Program an haloy nang napatunayang salbado asin epektibo.
Huli kaini, pig inkaminar man kan opisyal an publiko na magpabakuna orog na sa mga kaakian. Tangani masimbagan an mga pigpapakuriyat nin mga anti-vaxxer na salang impormasyon online, pigpapahigot na kan DOH an health education asin magin an promotions kaini, pakikipagtabangan sa social media platforms tangani itake-down an mga salang impormasyon dapit sa bakuna siringman nakikipag-koordinar na ini sa mga ahensiya tangani madakop an mga nasmabitan ng nagpapalakop nin salang impormasyon.
