NAGA CITY- Pigsaysay kan Department of Science and Technology (DOST) na namuhunan ini kan nasa P135 million sa Bicol region tanganing suportaran an mga micro, small, and medium enterprises puon 2022 hasta 2025.
Saro kaya sa mga inisyatiba kan ahensiya sa Rehiyon iyo an Small Enterprise Technology Upgrading Program (SETUP) asin an Community Empowerment sa paagi kan Science and Technology (CEST) program.
An nasambitan ng setup program nagtatao nin dalan asin opurtunidad sa mga MSMEs an i-lebel up an saidang kalidad kan produkto.
Apwera digde, an CEST program, an saro pa sa mga inisyatiba kan ahensiya na makapagtao nin kabuhayan sa mga nagtateos na komunidadsa pakikipag-koordinar sa mga organisasyon siring kan Philippine Chamber of Commerce.
An programa nakareseber nin P40 million budget allocation kun saen natatabangan kaini an nasa 20 na komunidad sa Rehiyon.
Enot nang pigsaysay ni DOST Secretary Renato U. Solidum Jr. na an ahensiya nagkukundusir asin nagsusuporta man sa mga research siringman nagtatao nin mga teknolohiya tanganing mapauswag an mga importanteng agricultural industries kabali na an coconut, abaca, pineapple, asin cacao.
Katakod digde, naghahanap naman soboot an ahensiya nin makaka-partner na Unibersidad sa Rehiyon na interesado sa pagtataong focus sa research sa mga agricultural commodities.
Mientrastanto, sigun man sa Philippine Statistics Authority, an premirong agricultural products kan Rehiyong Bicol iyo an niyog, pineapple, abaca, pili nuts, paroy, asin mais
