NAGA CITY- Nasunadan na nin maninigong kaso an barangay kagawad asin an duwang iba pa na nakuanan nin mga kontrabando sa pigkondusir na Oplan Galugad sa custodial facility kan Iriga City PNP.
Sa entrevista kan Bombo Radyo Naga ki P/Supt. Alex Pederio, chief of police kan Iriga City PNP, sinaysay kaini na nakumpiskar an apat na sachet nin shabu na pigtutubudang pagsasadiri ni Alan Alanis na sarong barangay kagawad asin ni Oliver Oñedo.
Posibleng iniipit sa libro o kaya man pighahalo sa kakanon an iligal na droga na dinadara sa mga nakakulong sa nasambitang custodial facility.
Aminado man si Pederio na mayong CCTV camera sa saindang kulungan tanganing mahigot na mabantayan an mga nagtitinir digdi.
Katakod kaini, nasunadan naman nin panibagong kaso an tolong persona na nakuanan nin shabu sa laog kan karsel.
Tinawan doon ni Pederio na dae ninda pigkokonsintir an nasambitang iligil na gibo kan mga nakakarsel sa saindang custodial facility.
