NAGA CITY- Mapakol sa kabilugang 100,414 minimum wage earners sa Bicol Region an makakareseber nin dugang na P40 sa saindang aldawang sweldo makalihis na aprubahan ini kan Regional Tripartite Wages and Productivity Board (RTWPB).
Sigun sa Department of Labor and Employment (DOLE) susog sa Wage Order No. RBV-22 an daily minimum wage sa Rehiyon na gikan sa P395 ini an magigin P435 para sa gabos na sektor o industriya.
An nasambitan ng wage adjustment an i-implementar sa paagi kan duwang tranches, sa April 5 asin Dec. 1.
An mga Retail asin service establishments na regular na igwang empleyado kan dae masobra sa 10 siringman an mga enterprises na naapektaran kan kalamidad o kaya kan human-induced disasters an pwedeng mag-apply nin exemption sa nasambitan ng dugang na sweldo susog sa Omnibus Rules on Minimum Wage Determination.
Mantang an mga registered barangay micro business enterprises an dae man sakop kan minimum wage law susog sa Republic Act No. 9178.
Mientrastanto, nasa 316,784 full-time wage asin salary workers na nagkikita nin mas halangkaw sa minimum wage an pwedeng makinabang sa paglangkaw kan sweldo.
An bagong minimum wage rate sa Bicol Region an pigbusol kan mga labor representatives kan November 2024 tanganing maasegurar an liwat na pagbuhat kan ekonomiya gikan sa nagin epekto kan Severe Tropical Storm Kristine kan nakalihis na Oktubre 2024.
An kasuguan na ini an pinagtibay kan National Wages and Productivity Commission na pig-aprubahan kan RTWPB kan nakalihis na March 14
