NAGA CITY- Nagtetenir suboot an kumpyansa ni Presidente Rodrigo Duterte ki Justice Secretary Vitaliano Aguirre sa ibong kan manibong-ibong na pangapudan na magbutas na ini sa saiyang pwesto.
Ini katakod kan mga kontrobersyal na desisyon na ipinaluwas kan mga nakaaging aldaw kan Department of Justice (DOJ) kabale na an pag-abswelto ki self-confessed drug lord Kerwin Espinosa asin iba pang pigtutukdong drug lord sa drug trafficking charges siring man an pagsasairarom sa provisional Witness Protection Program (WPP) ki pork barrel scam queen Janet-Lim Napoles.
Sigon ki Presidential Spokesperson Harry Roque, mantang nasa gabinete pa an sarong opisyal, nagtetenir pa an tiwala asin kumpyansa digdi kan hepe ehekutibo.
Enot digdi, sinaysay man suboot kan hepe ehekutibo na kinakaipuhan mabaliktad asin mabago an desisyon manungod sa kaso ni Espinosa asin kan iba pang mga drug lords huli ta dae ini kaako-ako.
Mientrastanto, pigklaro man ni Roque na mayo pa sa irarom kan WPP si Napoles asin nasa provisional protection pa sana ini huli ta kinakaipuhan munang pag-adalan kun posible ining makalaog sa nasambitan ng programa.
Sa huri, tinawan doon ni Sec. Roque na pigrerespeto kan Palasyo an mga desisyon kan Department of Justice.
