NAGA CITY- Makalihis na maabswelto sa kaso na pigsangat sa Department of Justice (DOJ) dae na nalikayan pa ngonyan kan dating alkalde kan banwaan nin Caramoan, Camarines Sur na magtao nin mensahe laban sa nagkapirang mga opisyal na nagbale sa saiyang pangaran sa kontrobersyal na mega shabu laboratory na nadiskobre sa probinsya nin Catanduanes.
Sa entrevista kan Bombo Radyo Naga ki dating Caramoan Mayor Constantino Cordial, mensahe kaini ki dating Philippine National Police Regional Office V (PRO5) asin ngonyan Bureau of Corrections (BuCor) deputy Dir. Melvin Buenafe asin sa saro pang opisyal kan PNP-Catanduanes na dae magpagamit sa kun sisay pang pulitiko.
Ini katakod kan enot na pahayag ni Cordial na pamumulitika sana an rason kun tano naguguyod an saiyang pangaran sa nasambitang kontrobersiya na nagputok kan taong 2016.
Tulos niya na kinaolay si Buenafe kan maaraman niyang naimbwelto na an saiyang pangaran sa kontrobersiya kun saen nagmaang-maangan suboot ini.
Likay naman si Cordial na isapubliko pa kun sisay an mga pulitiko na saiyang pigsasabi asin liwat na tinawan doon na biktima sana siya sa pangyayari kun saen mga darakulang personalidad suboot an yaon sa likod kaini.
