Inihayag ni Ombudsman Jesus Crispin ‘Boying’ Remulla na mahagad an opisina nin ‘freeze order’ kontra sa mga kongresistang naiimbwelto sa isyu kan korapsiyon sa flood control projects.
Sigun mismo sa Ombudsman, hahagadon ini sa Anti-Money Laundering Council tanganing ma-freeze an assest asin bank accounts kan mga opisyal na imbwelto sa anomalya.
Alagad maski igwa na soboot mga pending request sa nasambitan ng konseho, pigsierto ni Ombudsman Remulla na mahagad pa man sinda nin ‘freeze order’.
Partikularmente sa mga pigkokonsiderar komo ‘persons of interest’ iyo sinda ACT-CIS Party-list Rep. Edvic Yap, Benguet Lone District Rep. Eric Yap asin Bulacan Rep. Salvador Pleyto.Ini an huli sa pagkakadawit kan saindang mga pangaran sa ghost asin substandard na flood control projects kan gobyerno.
Alegasyon kaya sa sainda ni Ombudsman Remulla na nakaresebir soboot an mga ini nin remittance o kwarta gikan sa mga kontratistang Discaya.
Mantang patungkol man sa kun nuarin ninda balak magsumiter kan saindang kahagadan, sigun ki Ombudsman Remulla, sa orog na marekas na panahon an hahagadon na ini kan opisina.
Ipapadara na sana soboot sa Anti-Money Laundering Council an cover page kan mga reklamong pigsunad kan Department of Public Works and Highways sa Ombudsman tanganing aksyunan an patungkol digde.
Marurumduman na kasuarin sana, pormal nang pigsunad kan Department of Public Works and Highways sa Office of the Ombudsman an mga reklamo katakod sa flood control projects anomaly.
Saindang pigsunad an reklamong malversation of public funds through falsification of public documents kontra sa 20-opisyal kan ahensiya asin 2-construction corporation.
Alagad maski dae kaibahan digde an mga naunambitan ng kongresisa, pighurot ni Ombudsman Remulla na dawit pa man an mga ini huli man ta sinda an nakaresebir nin kwarta gikan sa mga kontratistang Discaya.
Huli digde, ipinasairarom o irinani soboot ini sa Anti-Money Laundering Council tanganing masuri an mga lehislador dapit sa mga kontratang dawit sa isyu.
Digde pigtawan-duon ni Ombudsman Remulla na dapat mayong koneksiyon an mga kongresista sa sisay man na kontratista asin anuman na kontrata sa mga proyekto kan gobyerno.
Mientrastanto, ipigheras man ni Secretary Vince Dizon kan Department of Public Works and Highways na an alegasyon na nagdadawit ki Congressman Eric Yap komo beneficial owner kan Silverwolves Construction Corporation an naresebir ninda gikan ki Baguio City Mayor Benjamin Magalong.
Kun kaya saiyang sinabi na saindang pigpapaubaya na sana an mga reklamo sa tanodbayan o an Office of the Ombudsman.
